Ռուսաստանում ավարտվել է նախագահի թեկնածուների գրանցումը. պաշտոնի համար կպայքարի 4 թեկնածու
Ռուսաստանի Դաշնության Կենտրոնական ընտրական հանձնաժողովն ավարտել է նախագահական ընտրությունների թեկնածուների գրանցումը, որի արդյունքում երկրի գլխավոր ղեկավար պաշտոնի համար կպայքարի չորս թեկնածու՝ «Նոր մարդիկ» կուսակցության թեկնածու, գործող ղեկավար Վլադիսլավ Դավանկովը, գործող նախագահ, ինքնառաջադրված Վլադիմիր Պուտինը, Ռուսաստանի լիբերալ-դեմոկրատական կուսակցության առաջնորդ Լեոնիդ Սլուցկին և ՌԴ Կոմունիստական կուսակցության թեկնածու Նիկոլայ Խարիտոնովը։ Այս մասին հայտնում է ՏԱՍՍ-ը:
Կուսակցական թեկնածուների ընտրություններին մասնակցության առաջադրման փուլը տևել է դեկտեմբերի 8-ից հունվարի 1-ը, ինքնաառաջադրված թեկնածուների համար այն ավարտվել է դեկտեմբերի 27-ին։ Դեկտեմբերի 28-ին Ռուսաստանի Դաշնության Կենտրոնական ընտրական հանձնաժողովի ղեկավար Էլլա Պամֆիլովան հայտնել է, որ առաջադրման համար դիմողների թիվը կազմել է 33 (9-ը՝ կուսակցություններից և 24-ը՝ ինքնաառաջադրված թեկնածուներ): Դրանցից ԿԸՀ առաջադրման փաստաթղթեր են ներկայացրել 15 հոգի։
Փետրվարի 8-ին Կենտրոնական ընտրական հանձնաժողովը հրաժարվել է թեկնածուներ Մալինկովիչին և Նադեժդինին գրանցել ընտրություններին մասնակցելու համար՝ ընտրողների թերի ստորագրությունների բարձր տոկոսի պատճառով։ Երկու թեկնածուներն էլ ունեցել են ստորագրությունների թույլատրելի 5%-ը գերազանցող թերություններ (Մալինկովիչ՝ 14,9%, Նադեժդին՝ 15,2%)։
Թեկնածուների մասին
Դավանկովը 39 տարեկան է: Պետդումայում նա զբաղեցնում է «Նոր մարդիկ» կուսակցության փոխնախագահի և խմբակցության ղեկավարի առաջին տեղակալի պաշտոնները։ 2023 թվականին նա մասնակցել է Մոսկվայի քաղաքապետի ընտրություններին՝ զբաղեցնելով չորրորդ տեղը և հավաքելով ձայների 5,34%-ը։
Պուտինը 71 տարեկան է, նրա համար առաջիկա ընտրությունները կլինեն հինգերորդը իր քաղաքական կարիերայում, մինչ այդ նա չորս անգամ ընտրվել է պետության ղեկավար (2000, 2004, 2012, 2018), լավագույն արդյունքը ցույց է տվել 2018թ.-ին: Նա ստացել է ընտրողների ձայների 76,69%-ը։
Սլուցկին 56 տարեկան է, նա գլխավորում է ՌԼԴԿ-ն 2022 թվականի մայիսից և Դումայի միջազգային հարաբերությունների հանձնաժողովի նախագահն է։ Նա դարձավ կուսակցության պատմության երրորդ թեկնածուն նախագահական ընտրություններում, կուսակցությունը նախկինում ընտրություններում ներկայացնում էին նրա հիմնադիր Վլադիմիր Ժիրինովսկին (1991, 1996, 2000, 2008, 2012 և 2018 թթ.) և Օլեգ Մալիշկինը (2004 թ.):
Խարիտոնովը 75 տարեկան է, նա Պետդումայի բոլոր ութ գումարումների պատգամավոր է։ Ութերորդ գումարմանը նա ղեկավարում է Հեռավոր Արևելքի և Արկտիկայի զարգացման կոմիտեն։ Նրա համար գալիք նախագահական ընտրությունները երկրորդն են՝ ուղիղ 20 տարի առաջ նա զբաղեցրել է երկրորդ տեղը՝ հավաքելով ձայների 13,69 տոկոսը։
