ՀՀ վարչապետ Փաշինյանի այցը Մոսկվա ցույց տվեց, որ Ռուսաստանի համբերությունը սպառվում է. ռուս քաղաքագետ

Ռուսաստանի հետ Հայաստանի հարաբերությունների վերջնական խզումը կարող է ճակատագրական լինել։ Այս մասին հայտնել է ռուս քաղաքագետ, Տնտեսության բարձրագույն դպրոցի Եվրոպական եւ միջազգային հետազոտությունների կենտրոն Գիտահետազոտական համալսարանի (ՏԲԴ ԵՄՀԿ ԳՀՀ) փոխտնօրեն Դմիտրի Սուսլովը Երեւանում անցկացվող կլոր սեղանի ընթացքում։

Նրա խոսքով՝ Ռուսաստանը մնում է աշխարհաքաղաքական հակառակորդների գլխավոր զսպող գործոնը. նրա բացակայությունը նոր պատերազմը կդարձնի գործնականում անխուսափելի։ Դմիտրի Սուսլովի կարծիքով՝ Հայաստանի ներկա կառավարության օրոք երկրի քաղաքականությունը ոչ թե դիվերսիֆիկացվում է, այլ ուղղություն է ընտրել դեպի Արեւմուտք։ Ընդ որում, Եվրասիական տնտեսական միությանը (ԵԱՏՄ) մասնակցությունը ներկայացվում է որպես պարտադրված, այն աստիճանաբար դուրս է մղվում։ Այս ուղղությունը հանգեցնում է Հայաստանի դուրս գալուն ԵԱՏՄ-ից, ռուսական ռազմակայանի դուրսբերմանը Գյումրիից եւ հարաբերությունների վատթարացմանը՝ Ադրբեջանի, Թուրքիայի, ԵՄ-ի եւ ԱՄՆ-ի հետ հարաբերությունների բարելավմանը զուգընթաց։ Այս ամենը Ռուսաստանի հետ Հայաստանի հարաբերությունների վերջնական խզումը դարձնում է ժամանակի հարց։ Ռուսաստանը սա ընկալում է ոչ թե որպես դիվերսիֆիկացում, այլ որպես աստիճանական անցում հակառակորդի կողմը, որը չի թաքցնում իր ծրագրերը եւ պատրաստվում է պատերազմի։

Ռուս քաղաքագետը նշել է, որ ՀՀ վարչապետ Փաշինյանի վերջերս Մոսկվա կատարած այցը ցույց տվեց, որ Ռուսաստանի համբերությունը սպառվում է։ Սառը պատերազմի պայմաններում Մոսկվան հետաքրքրված չէ իրավիճակի սրմամբ, բայց չի պատրաստվում պարզապես դիտել, թե ինչպես է Հայաստանը հեռանում դեպի Արեւմուտք։ Հետեւաբար, խնդրում է կողմնորոշվել։ Քաղաքագետի կարծիքով՝ հաշվի առնելով ներկա աշխարհաքաղաքական իրողությունները՝ Երեւանը պետք է առնվազն շահագրգռված լինի Ռուսաստանի հետ հարաբերությունների պահպանմամբ, իսկ իդեալականում՝ մերձեցմամբ, քանի որ միայն լավ հարաբերություններն ու ներկայությունը, այդ թվում՝ Գյումրիի ռազմակայանը, ապահովում են Հայաստանի անվտանգությունը եւ երաշխավորում են Ադրբեջանի եւ Թուրքիայի կողմից Հայաստանի դեմ լայնածավալ ագրեսիա իրականացնելու փորձերից։ Քաղաքագետը ավելացրել է, որ Արեւմուտքի համար Հայաստանը եւ Անդրկովկասն ընդհանրապես «նյութ» են Ռուսաստանի դեմ պայքարում։ Քաղաքագետը փաստել է, որ Հայաստանի պաշտպանվելու անկարողությունը եւ Իրանի թուլացումը Հայաստանի դիրքը դարձնում են չափազանց անհուսալի։