Վատիկանը հավաքում է «էքզորցիստ քահանաների բանակ»՝ սատանիզմի դեմ պայքարելու համար

Հռոմի պապ Լևոն XIV-ը Վատիկանում փակ հանդիպում է անցկացրել աշխարհի առաջատար էքզորցիստների հետ՝ ամբողջ աշխարհում «օկուլտիզմի, էզոտերիզմի և սատանիզմի սարսափելի աճի» մասին մտահոգիչ զեկույցից հետո։

Էքզորցիստների միջազգային ասոցիացիայի (AIE) քահանաների պատվիրակությունը Հռոմի պապին ներկայացրել է օկուլտիզմի հետ կապված դեպքերի աճող թվի և մարդկանց համար դրա հոգևոր հետևանքների մասին զեկույց։

«Ասոցիացիան խնդրել է, որ աշխարհի յուրաքանչյուր թեմ ունենա առնվազն մեկ լավ պատրաստված էքզորցիստ», - հաղորդում է EWTN Vatican-ը։

AIE-ի փոխնախագահ Ֆրանչեսկո Բամոնտեն ընդգծել է. «Այս խնդիրների անտեսումը հավատացյալներին թողնում է առանց համապատասխան օգնության լուրջ հոգևոր տառապանքների դեպքում, երբեմն նրանց մղելով անպատշաճ լուծումների»։

Հռոմի պապի հետ հանդիպումը տեղի է ունեցել մարտի 13-ին, սակայն լրատվամիջոցները դրա մասին հաղորդել են միայն անցյալ շաբաթ։ 70-ամյա Հռոմի պապ Լևոն XIV-ը նախկինում էքզորցիստների աշխատանքը համարել էր «նուրբ, բայց չափազանց անհրաժեշտ», նշելով, որ քահանաները պետք է օգնեն հավատացյալներին, որոնք «իսկապես չար ոգով են տարված՝ աղոթքով և Քրիստոսի ներկայության կանչով»։

Հետաքրքիր է, որ Էքզորցիստների միջազգային ասոցիացիան ոգեշնչման աղբյուր է հանդիսացել 2023 թվականի «Հռոմի պապի էքզորցիստը» (The Pope’s Exorcist) ֆիլմի համար, որի գլխավոր դերում է Ռասել Քրոուն։