Իռլանդիայում 530 միլիոն եվրոյով տուգանել են TikTok-ը. Reuters

Իռլանդիայի տվյալների պաշտպանության կարգավորող մարմինն այս շաբաթ 530 միլիոն եվրոյով տուգանել է ByteDance ընկերությանը, որը հանդիսանում է TikTok կարճ վիդեո ծառայության սեփականատերը: Ընկերությունը տուգանվել է անձնական տվյալների պաշտպանության մասին ԵՄ կանոնակարգի խախտման համար: Այս մասին հայտնում է Reuters գործակալությունը։

Հանձնաժողովը պարզել է, որ ByteDance-ը չի կարողացել ապացուցել, որ սահմանափակել է չինացի աշխատակիցների մուտքը ԵՄ օգտատերերի տվյալներին: Եվրոպական օրենսդրությունը պահանջում է, որ տվյալները պահպանվեն տարածաշրջանում: Ընկերությանը հանձնարարվել է վեց ամսվա ընթացքում իր տվյալների մշակումը համապատասխանեցնել ԵՄ օրենքներին:

ByteDance-ի ներկայացուցիչները հայտարարել են որոշումը վիճարկելու իրենց մտադրության մասին: Նրանք պնդում են, որ որոշումը հաշվի չի առնում 2023 թվականին ներդրված անվտանգության միջոցները: ByteDance-ը բացատրել է, որ ԵՄ օգտատերերի տվյալները պահվում են Եվրոպայում և ԱՄՆ-ում հատուկ տվյալների մշակման կենտրոններում, և ընկերությունը երբեք չի ստացել այս տվյալներին մուտք գործելու հարցումներ Չինաստանի իշխանություններից:

TikTok-ի օգտատերերի բազան Եվրոպայում կազմում է շուրջ 175 միլիոն: Սա տարածաշրջանում ByteDance-ի համար առաջին խոշոր տուգանքը չէ: 2023 թվականին ընկերությունը տուգանվել է 345 միլիոն եվրոյով երեխաների անձնական տվյալների մշակման կանոնները խախտելու համար։