Հայաստանի և Ադրբեջանի համար իրական հնարավորություն կա՝ առաջընթացը վերածելու երկարատև խաղաղության. ԵԽ գլխավոր քարտուղար
- 3 hours ago
- 1 min read
Եվրոպայի խորհրդի գլխավոր քարտուղար Ալեն Բերսետը այսօր կոչ է արել ավելի մեծ եվրոպական միասնության՝ ի պատասխան աշխարհաքաղաքական մարտահրավերների աճի՝ սկսած ռուս-ուկրաինական հակամարտությունից և Մերձավոր Արևելքում անկայունությունից մինչև միգրացիա և արտաքին միջամտություն։
Խոսելով աշխարհում տեղի ունեցող հակամարտությունների ու դրա հնարավոր լուծումների մասին Բերսետը ընդգծել է , որ Եվրոպայի աշխարհաքաղաքական ձգողականության կենտրոնը տեղափոխվում է։
«Եվրոպայի աշխարհաքաղաքական ձգողականության կենտրոնը տեղափոխվում է դեպի արևելք՝ 39-րդ հյուսիսային զուգահեռականի երկայնքով: Այդ առանցքը անցնում է չորս անդամ պետությունների միջով: Հայաստանը, Ադրբեջանը, Վրաստանը և Թուրքիան գտնվում են Ուկրաինայի պատերազմի, Մերձավոր Արևելքի պատերազմի և Կենտրոնական Ասիայի քաղաքական ու տնտեսական տեղաշարժերի խաչմերուկում, որոնց մասշտաբներըԵվրոպան դեռևս չի յուրացրել»,- ասել է Բերսետը:
Նա նշել է, որ Վաշինգտոնյան համաձայնագրից մեկ տարի անց Հայաստանն ու Ադրբեջանն ունեն իրական հնարավորություն առաջընթացը վերածելու երկարատև խաղաղության։ Իսկ Հայաստանն ու Թուրքիան քայլեր են ձեռնարկել հարաբերությունների կարգավորման ուղղությամբ՝ հավելելով , որ առանց Թուրքիայի մայրցամաքում անվտանգության և նաև ժողովրդավարության մասին զրույցներ տեղի չեն ունենում:
«Կառավարությունների միջև խաղաղությունը բավարար չէ: Այն պահանջում է հասարակությունների միջև վստահություն, իրավունքների հարգանք և հաշտեցումը պահպանելու ունակ ինստիտուտներ, ինչն էլ ապահովում է ընդհանուր իրավական տարածքը: Դրա ուժը կախված է բոլոր անդամ պետությունների կողմից դրա նորմերի պահպանումից՝ առանց բացառությունների, բայց նաև վստահությունից, թափանցիկությունից և կրկնակի ստանդարտների բացակայությունից»,- եզրափակել է նա։
