«Ավազակ տատիկը» ընտանեկան նարկոկայսրություն է հիմնել և ամբողջ երկրում կոկաին վաճառել

2023 թվականի ապրիլյան մի վաղ առավոտ գաղտնի գործակալները հետևում էին, թե ինչպես է մի կին արկղեր բարձում վարձակալած մեքենայի մեջ անգլիական Էսեքս կոմսության Հարվիչ նավահանգստի մոտ գտնվող մանրածախ առևտրի կայանատեղիում։

Նրանք տեղեկություն էին ստացել մեքենայի մասին, որը նույն գիշեր դուրս էր եկել Իսլինգթոնից։ Մեքենան շարժվել է դեպի Իփսվիչ, որտեղ կինը սպիտակեղենով ծանր փաթեթ էր փոխանցել անհայտ տղամարդու, գրում է BBC News-ը։

Նա նման չէր մարդու, որին կարելի էր կասկածել թմրանյութերի գործարքի մեջ. նրա փաստաբանն ասել է, որ նա «անկասկած, առանձնացվել էր որպես մարդ, որը աչքի չէր ընկնում»։ Այդ կինը Դեբորա Մեյսոնն էր՝ ընտանիքում հայտնի որպես Գանգստեր Դեբս կամ Մեղվամայր. տատիկ և հանցավոր ընտանիքի մատրիարխ, որը գործում էր ամբողջ հարավ-արևելյան Անգլիայում։ Մեյսոնը ներգրավել էր իր չորս երեխաներին, քրոջը և այլ մերձավոր ազգականների, որպեսզի նրանք օգնեն կոկաին մատակարարել ամբողջ երկրում՝ ֆինանսավորելով շքեղ ապրելակերպ, որը ներառում էր Gucci-ի դիզայներական ապրանքներ՝ գնված նրա կատվի համար, և 192 ֆունտ ստերլինգ արժողությամբ Bugatti թեյնիկ։

Ուրբաթ օրը Վուլվիչի թագավորական դատարանը 65-ամյա կնոջը դատապարտել է 20 տարվա ազատազրկման՝ A դասի թմրանյութեր մատակարարելու նպատակով դավադրության համար։

Հանցախմբի մյուս անդամները նույն մեղադրանքով դատապարտվել են 10-ից 15 տարվա ազատազրկման։ Հարվիչի այդ առավոտից հետո մայրաքաղաքային ոստիկանությունը յոթ ամիս շարունակ հետևել է Մեյսոնին, մինչ նա և իր ընտանեկան հանցախումբը զբաղվում էին նավահանգիստներում՝ հիմնականում Հարվիչում, բայց նաև Ֆոլքսթոնում և Դուվրում, կոկաինի և A դասի թմրանյութերի հավաքմամբ։

Ոստիկանությունը հետևել է հանցախմբի գործողություններին Հարավային Լոնդոնում, Քարդիֆում, Բրիստոլում, Շեֆիլդում, Ռոտերհեմում, Մանչեսթերում, Բրեդֆորդում, Սաութենդում, Լեսթերում և Ուոլսոլում։